ٹک ٹاک کا ذہنی صحت بہتر بنانے کیلئے نئے فیچرز کا اعلان

ٹک ٹاک نے نوجوانوں سمیت تمام صارفین کی ذہنی صحت بہتر بنانے کے لیے مراقبے، نیند اور شخصیت سازی سے متعلق نئے فیچرز متعارف کرا دیے ہیں۔

کمپنی کے مطابق یہ فیچرز نیند کے اوقات میں متحرک ہوں گے اور صارفین کو سکون اور توجہ مرکوز رکھنے کی مشقیں تجویز کریں گے۔ 18 سال سے کم عمر صارفین کے لیے یہ فیچر ایپ میں بائی ڈیفالٹ آن ہوگا۔

کمپنی کے مطابق اگر نوجوان رات 10 بجے کے بعد ایپ استعمال کریں گے تو انہیں مراقبے کی مشقوں کا مشورہ دیا جائے گا۔ مسلسل استعمال پر فل اسکرین نوٹیفکیشن بھی دکھایا جائے گا۔ ان مشقوں کے لیے ایک خصوصی مراقبہ ایپ کی مدد بھی لی جا رہی ہے۔

ٹک ٹاک نے اس کے ساتھ ساتھ نئی ایجوکیشنل فیڈ، آن لائن سیفٹی ٹولز، اور اسکرین ٹائم پر والدین کے کنٹرول جیسے فیچرز بھی شامل کیے ہیں، تاکہ صارفین کا ڈیجیٹل تجربہ زیادہ محفوظ اور صحت مند بنایا جا سکے۔